काठमाडाै । वरिष्ठ पत्रकार कौशल चेम्जोङद्वारा लिखित ‘उदयपुरको इतिहास’ नामक पुस्तककाे विमाेचन भएको छ।
ऐतिहासिक उदयपुर जिल्लाको समग्र रुपमा गहन इतिहास बोकेको पुस्तक शताब्दिपुरुष तथा इतिहासविद् सत्यमोहन जोशीले विमाेचन गरेकाे हो।
‘उदयपुरको इतिहास’ पुस्तकलाई इतिहासविद् जोशीले ललितपुरकाे बखुम्बहाल मंगलबजारस्थित एक कार्यक्रमकाविच सत्यमोहन जोशी लोकसाहित्य भवनमा लोकार्पण गरिएको थियो।
लामो समयसम्मकाे अध्ययन, खोज र संस्लेशण प्रष्ट झल्किएकाले यो नेपालकै इतिहासमा दर्ज हुने कार्यक्रममा सहभागी हुनेहरुको भनाई छ।
त्रिभुवन विश्वविद्यालयका इतिहास विभाग प्रमुख प्राध्यापक डा. राजकुमार पोखरेलले नेपालको ईतिहासमा एउटा अर्काे अध्याय थपिएको प्रष्ट पार्दै उनले बरिष्ठ पत्रकार चेम्जोङ अब इतिहासकार पनि भएको बताएका थिए।
प्राध्यापक पोखरेलले पुस्तकको समिक्षात्मक टिप्पणी गरेका थिए भने सिंगो पुस्तकको समिक्षा गर्दै प्राध्यापक डा. बिजय मिश्रले विविध महत्वपूर्ण दस्तावेज तथा ऐतिहासिक सामग्रीहरुकासाथ इतिहास् प्रस्तुत गरिएको जानकारी दिएका थिए।
प्राध्यापक मिश्रका अनुसार ‘उदयपुरको इतिहास’ पुस्तकमा नेपालको इतिहासमा मानव सभ्यता, ऐतिहासिक लडाई, विविध राज्यहरु उदयपुरसंग जोडिएको प्रमाण पेश गरिएको छ।
उक्त पुस्तकमा किराँत सभ्यता र अस्तित्वलाई प्राथमिकता दिईएको छ भने त्रियुगा सभ्यताको अहिलेसम्मकै ठोस, गहन जनाकारी र तथ्य पस्किएको दाबी गर्दै इतिहास अध्ययनका लागि पुस्तक महत्वपूर्ण र उपयुक्त रहेको उनको भनाई रहेको थियो।
पुस्तकका लागि चेम्जोङले २२ वर्ष लामो समय अध्ययनमा समय खर्चेको कार्यक्रममा जानकारी दिएका थिए। पुस्तक प्रकाशनको क्रममा पत्रकार एवम् इतिहासकार चेम्जोङले उदयपुरको कुनाकुना, कन्दराहरु चाहारेका थिए।
पत्रकार एवम् इतिहासकार चेम्जोङले विमोचन समारोहमा बोल्दै आफ्नो बुबाले दिएको पुरानो ऐतिहासिक सिक्काबाट प्रेरित भई पुस्तक लेखनतर्फ लागेको बताएका थिए।
पत्रकार एवम् इतिहासकार चेम्जोङले सदा इतिहासको विद्यार्थीको रुपमा गहन अध्यायन र खोजकासाथ अगाडि बढ्ने प्रतिबद्धता जनाएका थिए।
