अवार्ड भनेकै ठूलो सम्मान हो। ट्रफी सहितको सम्मानलाई नै अवार्ड भन्ने गरिएको छ। विशेष गरेर यो अवार्डको कुरा कला संगीत, चलचित्र, मनोरञ्जन क्षेत्रमा चर्चाको विषय बन्ने गरेको छ। कला क्षेत्रमा अवार्ड वितरण गर्ने भनेको नयाँ कुरा होइन। चलचित्रको संसारमा अवार्ड वितरणको परम्परा निकै पुरानो छ ।
नेपालमा मात्र नभइकन विश्व चलचित्र उद्योगमा नै अवार्डले अत्यन्त महत्व राख्ने गरेको छ। हलिउडको प्रसिद्ध अवार्ड ओस्कार मात्र बलिउडको फिल्म फेयर अवार्ड तथा नेपाली चलचित्रको मोशन पिक्चर अवार्ड चलचित्र क्षेत्रको प्रतिष्ठित अवार्ड हो। तर, नेपालमा भने थुप्रै विभिन्न संघ संस्थाहरूले विभिन्न नामबाट अवार्ड वितरण गर्ने गरिरहेका छन्। यसले अवार्डको महत्वलाई घटाएको पनि छ र बढाएको पनि छ।
चलचित्र क्षेत्रको यो अवार्डको यहाँ कुरा गर्न खोजेको नभइकन कोरोनाको महामारीमा फ्रन्टलाइनमा विभिन्न माध्यमवाट सहयोग गर्ने र गराउने व्यक्ति तथा संघ–संस्थालाई विभिन्न देशमा कोभिड-१९ हिरोको विशेष महत्वको कुरा भएको छ। कोरोनाभाइरस (कोभिड-१९) को महामारीमा कोभिड-१९ हिरो अवार्ड पाउने भन्ने कुरा अवश्य पनि चानचुने होइन। अत्यन्त महत्वपूर्ण कुरा हो।
कोरोनाको कहरमा मानिसलाई मर्नवाट विभिन्न किसिमले सहयोग गर्ने महत्वपूर्ण मान्छेलाई प्रदान गर्ने यो अवार्ड नेपाल वाहिर नेपालीहरुले एक पछि अर्को गरेर पाउंदैआएको छ। पछिल्लो समय विश्वको बैभवशाली राष्ट्र अमेरिकामा अमेरिकी सरकारले पनि कोभिड–१९ हिरो अवार्ड प्रदान गरेको छ। जुन अवार्ड पाउने भाग्यमानीमा जाति, धर्म तथा राजनीतिभन्दा माथि उठेर विश्वभरका नेपालीहरुलाई जोड्ने अभियानमा लागेको अमेरिकामा नै स्थापित हामी नेपाली ग्लोबलका केन्द्रिय अध्यक्ष अमृत लामा परेका छन्।
लामालाई कोभिड-१९ हिरो अवार्ड प्रदान गरिएको छ। अमृत लामा लगायत अमेरिकामा कोरोनाको महामारीमा विभिन्न किसिमले विशेष योगदान दिने नेपालीहरुलाई कोभिड–१९ हिरो अवार्ड प्रदान गरिनु नेपालीहरुको लागि अत्यन्त गौरबको कुरा हो। यस अवार्डले नेपालीहरुले नेपाल वाहिर प्रवासमा गरेको कोरोनाको कहरमा गरेको उच्च योगदानको विशिष्ट कदर हो। मातृभूमि नेपाल आमाको आँशु पुछ्न प्रवासमा गरेर गरेको योगदानको महत्व त छँदैछ। अर्कोतर्फ, प्रवासमा नेपाली तथा विदेशीलाई निस्वार्थ सेवा गर्ने महान नेपालीहरुलाई कोरोना कहरमा कोभिड–१९ हिरो पाउनु भनेको अत्यन्त गर्बिलो कुरा हो। यस्ता अवार्डले मानविय संवेदनाको कार्यमा निस्वार्थ सेवा दिने स्वदेशी तथा विदेशी सवैलाई प्रेरणा तथा हौसला दिने गरेको छ।
कोरोनाको महामारीमा मात्र नभइकन जुनसुकै काम विशेषमा योगदानको कदर स्वरुप प्रदान गरिने विभिन्न अवार्डले थप कार्य गर्न उत्प्रेरणा दिने गरेको छ। यसकारण जुनसुकै अवार्डको पनि महत्व र त्यसको सदा आवश्यकता हुने गर्दछ। यो महत्व र आवश्यकतामा सही मानिसको सही योगदानको सही कदर गरेर अवार्ड दिनु र दिन लगाउनु राम्रो कार्य हो।
