कोरोनाको महामारी विरुद्ध लडाइ लडिरहेको विश्वलाई कोरोना विरुद्धको भ्याक्सिन नै खुशीको खवर हो। कोरोना विरुद्धको भ्याक्सिनलाई प्रयोग गर्ने पहिलो हिम्मत तथा आँट अमेरिकाले भन्दा बेलायतले नै गरेको छ। बेलायत सरकारले कोरोनाविरुद्धको खोप सर्वसाधारणको लागि प्रयोग गर्न स्वीकृति दिएको छ। यो स्वीकृतिसंगै बेलायतीहरुले सवैभन्दा पहिलो पल्ट कोरोना विरुद्धको भ्याक्सिन लाउन पाउन लागेको हो।
अमेरिकी कम्पनी फाइजर र जर्मन बायोएनटेक कम्पनीले संयुक्त रुपमा बनाएको कोरोना विरुद्धको खोप सर्वसाधारणको प्रयोगका लागि बेलायती सरकारले स्वीकृति प्रदान गरेको खवरले विश्वलाई बाँच्ने आशा दिलाएको छ। कोरोनाको महामारीको कारण कैयनको सपना कुसमयमा नै तुहिएको वर्तमान समयमा कोरोना विरुद्धको भ्याक्सिन सवैका लागि आशाको केन्द्र बन्न थालेको हो। बेलायतले कोरोना विरुद्धको भ्याक्सिन प्रयोग गर्न त्यहाँको सरकारले स्वीकृति दिएजस्तै अव क्रमिक रुपमा विश्वका सवै मुलुकले दिने निश्चित छ।
बेलायतको नियामक निकाय ‘एमएचआरए’ले कोरोनाभाइरसको संक्रमण रोक्न ९५ प्रतिशत सफल भएको यो भ्याक्सिन अर्को हप्ताबाट सर्वसाधारणलाई लगाइने खबरले बेलायतीहरुमा मात्र नभइकन विश्वभर खुशीको तरंग उत्पन्न भएको छ । बेलायतले यसअघि नै फाइजरको भ्याक्सिन चार करोड ‘डोज’को ‘अर्डर’ गरिसकेको छ। यसबाट दुई करोड मानिसलाई भ्याक्सिन दिन सकिनेछ। तीन हप्ताको अन्तरालमा उक्त भ्याक्सिनको दुई मात्रा आवश्यक पर्ने विज्ञहरुको भनेको छ।
अमेरिका, जर्मनी, ब्राजिल, अर्जेन्टिना, दक्षिण अफ्रिका र टर्कीमा गरिएको परीक्षणमा उक्त भ्याक्सिनको दोस्रो मात्रा दिइएको सात दिनपछि भ्याक्सिन दिइएकाहरूमध्ये ९० प्रतिशतलाई संक्रमणबाट सुरक्षा प्राप्त भएको देखिएको परिणामवाट यो भ्याक्सिनको प्रयोग सर्वत्र सफल हुने अनुमान गरिएको छ। फाइजरले यस वर्षको अन्त्यसम्ममा पाँच करोड मात्रा भ्याक्सिन आपूर्ति गर्नसक्ने जनाएको छ।
सन् २०२१ को अन्त्यसम्ममा एक अर्ब ३० करोड मात्रा आपूर्ति गर्नसक्ने कम्पनीको दाबी छ। खोपको इतिहासमा यो सबैभन्दा छिटो स्वीकृति पाउने भ्याक्सिन बनेको छ। कोरोना महामारी सुरु भएको १० महिनाको अवधिमा यो भ्याक्सिन योजनाबाट अनुमतिसम्म आइपुगेको हो।
नेपालले पनि विश्वमा सफल परिक्षण प्रयोगवाट सफलता पाएको कोरोना विरुद्धको भ्याक्सिन ल्याउने कुराले पनि नेपालीहरुमा पनि बाँचिने भयो भन्ने आशा जगाएको छ। सर्वसाधारणको सुरक्षाका लागि नेपाल सरकारले विश्वमा छोटो समयमा सफल परिक्षण गरिएको भ्याक्सिन चाँडो भन्दा चाँडो नेपालमा ल्याएर नेपाली जनतालाई सुरक्षित बनाउने कार्य गर्नु आवश्यक छ। यस कार्यमा पछि हट्नु हुंदैन।
