काठमाडौँ । तेस्रो वार्सटाईनर गल्फ प्रतियोगिता-२०२१ को उपाधि जीवन लिम्बुले जितेका छन्।
नेपाल रोयल गल्फ क्लबमा सम्पन्न भएको वार्सटाईनर गल्फ प्रतियोगितामा लिम्बुले ४२ अंक हासिल गर्दै उक्त उपाधि जितेका हुन्।
वार्सटाईनर गल्फ प्रतियोगिता ३ र ४ स्टेबलफोर्ड फर्म्याटमा खेलाइएको प्रतियोगितामा एसएसपी अशोक सिंह पुरुषतर्फ ४० अंकसहित उपविजेता बनेका छन्।
त्यस्तै हृदेशकुमार सिंह ३२ अंक हासिल गर्दै ग्रस विजेता बनेका छन् । अर्शीया बानुले ३५ अंकसहित महिलातर्फको उपाधि जितेकी छन् भने महिलातर्फको उपविजेता कल्याणी मोक्तान बनेकी छन्।
त्यसैगरी ब्रिगेडियर जनरल दिलिपजंग रायमाझीले सिनियर सेक्शनको उपाधि जितेका छन् भने जनरल प्रज्वल एसजेबी राणाले सिनियरतर्फको उपविजेता बनेका छन् ।
तेस्रो वार्सटाईनर गल्फ प्रतियोगिता २०२१ मा लामाले मोस्ट बर्डीज अवार्ड जिते भने मिथुन राईले लन्गेष्ट ड्राइभ अवार्ड जितेका छन्।
त्यसैगरी रोयल गल्फ क्लबका अध्यक्ष प्रचण्ड बहादुर श्रेष्ठले क्लोजेस्ट टु द पोइन्ट अवार्ड जितेका छन् भने बेस्ट स्पोर्ट्सम्यान्सिपको अवार्ड कृष्णचन्द्र कायस्थले जितेका छन् ।
खेलका विजेताहरुलाई जावलाखेल ग्रुप अफ इण्डष्ट्रीजका प्रबन्ध निर्देशक राजबहादुर शाह, कार्यकारी निर्देशक सचिन जोशी, रोयल नेपाल गल्फ क्लबका अध्यक्ष श्रेष्ठले अवार्ड प्रदान गरेका थिए । विभिन्न क्याटेगरिका ११ विजेताहरुलाई वार्सटाईनर ट्रफी, आकर्षक टुर प्याकेज प्रदान गरिएको छ।
नेपालमा वार्सटाईनर प्रिमियम जर्मन बियरको शुरुवात भएको बर्ष २०१६ देखिनै रोयल नेपाल गल्फ क्लबसँग नेपालमा गल्फ खेलको विकासका लागि यस विश्वकै प्रख्यात वियरको सहकार्य रहदै आएको छ।
